對面那位

原劇本 / Original screenplay

念念不忘，必有迴響。

劇本（第二稿）

編劇：Chun

2022.8.27

第一場 (Day 1)

時：中午

地：茶餐廳

人：Martin、侍應、Sara

△侍應拿著一碟咖哩牛肉飯及一杯凍檸茶

△侍應將飯及飲品粗魯地放到坐於卡位的Martin 面前，隨即向前繼續走

△Martin 低頭望了一眼自己的咖哩牛肉飯，抬頭望向侍應背部

Martin：唔該，有無餐具？

△侍應轉過頭

侍應（不耐煩，指著餐檯）：側邊個櫃筒咪有囉。

△Martin 恍然大悟，拉開檯邊的抽屜

△Martin 拿起匙羹的同一剎那，眼角正好望到有人坐到對面的位子

△一塊黃色隔板突然從天而降，將餐檯分成兩邊

△Martin 未及反應，侍應的身影忽然出現在身邊。

侍應（望向隔板的另一方）：食咩呀靚女？

Sara：洋蔥豬扒飯，熱咖啡，唔該你。

侍應：洋蔥豬扒飯，熱啡，收到。

△Martin 眼前的隔板底下露出透明口罩套的一角

△Martin 微微伸長脖子，只看見隔板另一邊戴著冷帽的頭頂

出片名：《卡位對面》

△Martin 一口一口吃著咖哩牛肉飯

△對面隔板傳出Sara 的聲音

Sara（傷感）: 喂？你做咩唔聽我電話呀，我打咗好多次畀你喇。

△Martin 下意識抬頭，視線卻被黃色隔板阻隔

Sara: 你收到留言就打返畀我啦，拜拜。

△侍應從Martin 身邊走過，在隔板的另一端慢慢放下洋蔥豬扒飯

侍應（輕佻）：洋蔥豬扒飯、熱咖啡，叉羹喺晒櫃筒呢度，隨便拎。

△侍應說罷，順手拉開檯邊的抽屜，隨即大搖大擺向前走

Sara：唔該晒。

△Sara 將手伸前，拿取靠近Martin 位置的匙羹

△Martin 留意到，Sara 的左手中指上戴著戒指，上面的鑽石閃閃發亮

△Sara 將抽屜順手關上

△Martin 吃著飯，視線隨著Sara 的動作

△隔板靠牆的一方忽然伸出一隻手，彷彿正在尋找甚麼

△Martin 意會到Sara 正在尋找砂糖，連忙將靠近自己的砂糖罐推前

Sara：唔該你。

Martin （呆了一秒，下意識壓低聲線）：um…咳咳，唔駛客氣。

△Martin 回過神，吃下眼前最後的一口飯。

△Sara 的聲音再次傳來。

Sara：你究竟去咗邊呀？電話又唔聽，Message 又唔覆……

△Sara 說罷，傳來電話訊息已發送的聲音

△Martin 努力平靜心神，拿起凍檸茶用力吸啜

Sara：你係咪仲係好嬲我呀？我知我嗰晚語氣重咗……對唔住呀……

Sara：我哋不如好好坐低傾吓吖？

Sara：如果你冷靜返就打畀我吖……我會等你㗎。

△隔板對面接連發出數次訊息成功發送的聲響

△Martin 拿起玻璃杯，用膠匙羹戳著杯底的檸檬，再用力吸啜飲筒，飲筒發出「嗖」的聲響

△Martin 放下只剩冰塊的玻璃杯，發現隔板底下的口罩套已消失

△Martin 伸長脖子，卡位對面的女生已消失不見

△Martin 站起來，看見女生檯面上的飯只吃了一部分，飯上面的豬扒切開了三份，其中一份被咬了一口，洋蔥被整齊地堆放在旁邊。碟邊還放有一張100 元紙幣

△Martin 左顧右盼，四周人來人往，視線落在被推開後慢慢關上的大門

第二場 (Day 2)

時：中午

地：茶餐廳

人：Martin、侍應、Sara

△茶餐廳的門被推開

△Martin 進入茶餐廳，向侍應示意自己只有一位

△侍應指著卡位，示意Martin坐到該位置

△Martin 到達位子前，眼角看見一位女生已坐在卡位的另一邊，面前放著已吃了部分的碟頭飯，上面還剩下兩塊豬扒

△Martin 繼續走近，侍應將黃色隔板放到卡位中間分開兩邊，並放下一隻黃色水杯

△Martin 坐下，未有看見卡位對面的女生樣子

侍應：食咩？

Martin：洋蔥豬扒飯，凍檸茶少甜唔該。

侍應：洋蔥豬扒飯，凍檸茶少甜，OK。

△侍應撕下點餐紙，放在Martin 面前

△Martin 看見隔板底下的半個口罩套，皺了皺眉

△Martin 悄悄伸長脖子，看見與昨日相同的額頭

△Sara 剛好抬頭，Martin 急忙將頭縮回

△Martin 的頭定在半空，低頭望著檯面，心情緊張

△Sara 的聲音再次傳來

Sara：好耐無聽過你把聲喇……你幾好嘛？

△ Martin 嚇了一跳，未及抬頭就聽到Sara 的電話發出訊息已傳送的聲音

Sara：我今日又去咗你最鍾意嗰間茶餐廳呀，仲要坐返喺同一個卡位呀。

Sara：我哋中學嗰陣Lunch 成日嚟嗰間呢，你仲記唔記得呀？

Sara：我哋最鍾意嗌洋蔥豬扒飯，再加一杯凍檸茶share 食嗰間呢。

Sara：我頭先見到以前個老闆呀，不過我諗佢已經唔認得我喇。

Sara：不如我哋搵日再一齊嚟食吖？

△ Sara 的電話接連發出訊息已傳送的聲音

△另一端的Martin 吃著飯，動作變得異常緩慢

△侍應走過，將一杯熱咖啡放到Sara 檯面

△Martin 連忙將靠近自己方向的砂糖罐推近隔板邊緣

△ Sara 伸手將砂糖罐從隔板邊緣拿走

△Martin 聽見Sara 用鐵羹攪拌咖啡，隨即傳來Sara 的聲音

Sara：我真係好掛住你呀，如果你收到就覆下我丫。

Sara：你做緊咩呀？我好想同你傾偈呀……

Sara：無論點，我都會等你㗎。

△隔板對面接連發出數次訊息成功發送的聲響

△Martin 聽到Sara 的聲音越見哽咽，悄悄以最小的幅度打開身旁的抽屜，抽出一張餐紙

△Martin 將餐紙打橫放到隔板底下，猶豫著是否該推向另一端

△Martin 的電話忽然在檯面上震動，是一通不明來電

△Martin 連忙拿起電話，按下接聽鍵

Martin：喂喂，邊位？同我傾過貸款嘅林生……？邊個林生呀……我幾時有同你傾過貸款呀？無呀，無興趣，唔考慮呀，係咁先啦，拜拜。

△Martin 掛上電話

△侍應從旁走過，在Martin 面前放下一碟洋蔥豬扒飯，隨即繼續向前走

Martin（對著侍應背影）：唔該晒。

△Martin 帶點暴躁地拉開放置餐具的抽屜，拿出刀和匙羹，關上抽屜。

△Martin 將刀羹放到眼前的黃色水杯裡上下抖動

△Martin 忽然發現，原本只露出一小角的口罩套，不知何時已整個移到自己的一邊

△Martin 看了一眼口罩套，再望向眼前的隔板

Martin：小……小姐，你個口罩呀。

△Martin 說罷，將口罩套從隔板底下慢慢推過對面

△原本放在隔板邊緣的餐紙一角被口罩推前，穿過隔板底下到達另一邊

△口罩套隨即被輕輕拉走

Sara：噢，唔好意思呀，唔該晒你。

Martin：唔……唔駛客氣，小事小事。

△Martin 望著隔板，聳了聳肩，嘴角不自覺向上揚

△Martin 將水杯裡的刀拿出，用刀將碟上的洋蔥豬扒切開三分，用叉刺起其中一份，放進口中

Sara：先生。

△Martin 孤疑，抬頭望向聲音來源，正好與隔板上方的雙眼對視

△Martin 嚇了一跳，一口飯落入氣管，止不住咳嗽

Martin：咳……咳……咳……

Sara：唔……唔好意思呀，我想請問……你介唔介意幫我一個忙？

△Martin 捂著嘴，清了清喉嚨，面紅耳熱地望著Sara，輕輕點了點頭

△Sara 的頭縮了回去，在隔板的另一邊開口

Sara：我男朋友早兩日走咗……

△Martin 瞪大雙眼，咳嗽戛然而止

Sara（聲音顫抖）：出事之前一晚，我哋為咗結婚嘅事嗌咗場大交，之後佢幾日都無再搵我，我都係尋日先知原來……

△Sara 越說越細聲，一陣哽咽語塞

△雙方默不作聲，氣氛尷尬

Martin（深呼吸）：um……但係……sorry 呀……我可以點樣幫你？

Sara（抽鼻）：我……我頭先聽到你講嘢，我覺得……你把聲同我男朋友一模一樣……

Martin：吓……？

△ 隔板底下傳來一部電話，電話上顯示著數行文字

Sara：如果……如果可以嘅話，你可唔可以讀一次呢一段字畀我聽？唔該你……

△Martin 的身體微微向前傾，照著電話裡的文字，一字一頓地讀出

Martin：我……我請在場各人見證，我…….劉學秋，願以你，陳莎莉為我合法妻子…...

△Martin 讀完，抬頭望著隔板上方，卻未有看見預期中的雙眼

△Sara 的聲音從隔板後傳來

Sara（哽咽）：我……我請在場各人見證，我陳莎莉，願以你，劉學秋為我合法丈夫…...

△Martin 聽到Sara 在另一端啜泣

△Martin 將放在檯面上的餐紙，慢慢向前推到隔板對面

△本身已在默默流淚的Sara 看見隔板底下的餐紙，不由自主哭得更加厲害

△Sara 拿起餐紙，崩潰地掩著面拭淚

Sara（哽咽）：多謝你呀……老公。

△隔板另一端傳來熟悉的聲音

男子：再見喇，老婆。以後要好好照顧自己，唔好餓親呀。

△Sara 瞪大雙眼，抹眼淚的動作戛然而止。

△Sara 連忙站起，只見隔板的另一邊空無一人，剩下一碟吃了一半、洋蔥同樣被整齊地堆到一邊，只剩下一塊豬扒的碟頭飯，以及一杯只剩下冰塊的凍檸茶。

[End]

Special thanks to: Cola, Wingyu, Winson MC, 身體太虛